Recuperamos a valiosa obra xornalística para Vida Gallega dunha das figuras máis relevantes da cultura galega do século XX, Paco del Riego (Lourenzá-Lugo, 1913). Sesenta artigos escritos nos anos cincuenta e sesenta que permanecían inéditos en libro e nos que o histórico galeguista fai uso dunha prosa altamente suxestiva coa que nos transporta pola historia e o sentir de Galicia a través dos séculos.

Alvarellos Editora presenta o segundo tomo da súa Colección Rescate. Trala publicación, o pasado verán, do libro Viajes y yantares por Galicia, de Álvaro Cunqueiro, esta empresa lanza agora, no outono de 2005, a obra Sesenta gallegos ilustres de Francisco Fernández del Riego (Lourenzá-Lugo, 1913), un volume que recupera toda a obra xornalística publicada polo autor na revista Vida Gallega e que permanecía inédita en libro.

Trátase de sesenta artigos que este histórico galeguista -unha das figuras máis relevantes da cultura galega do século XX- escribiu entre os anos 1956 e 1962 dentro dunha sección fixa titulada “Perfiles gallegos”, asinada cun dos seudónimos habituais do escritor, Cosme Barreiros.

A través dunha prosa altamente suxestiva, en Sesenta gallegos ilustres Fernández del Riego lévanos pola historia e o sentir de Galicia a través dos seus poetas, pintores, músicos, políticos, aventureiros… Entre eles, Vicetto, Castelao, o Conde de Gondomar, Xoán Montes, Diego Gelmírez, Villar Ponte, Domingo Fontán, Couceiro Freijomil, Nóvoa Santos…

É o propio autor quen prologa hoxe, aos seus 92 anos, estes textos recuperados, que aparecen nesta coidada edición con outros traballos seus tamén inéditos en libro, e varios orixinais dos seus artigos tal e como os entregou o escritor á redacción de Vida Gallega.

PACO DEL RIEGO: “ERAN TEMPOS ESCUROS”

No seu Apunte Limiar, Fernández del Riego afirma que estes textos foron publicados nun tempo “de mesta escuridade para as Letras e a Lingua galegas. O uso público do idioma literario aturaba os máis duros atrancos. Fomentábase dende o poder político a desmemoria dos valores autóctonos e de todo o que supuxese afirmación do ser de Galicia”.

Así e todo, este novo libro de Fernández del Riego Sesenta gallegos ilustres permítenos comprobar como en cada páxina, e burlando todas as censuras, transmítese unha aberta defensa do ser e a identidade de Galicia.

>> Escoita ao autor recitando un fragmento do Prólogo
Gravado en Vigo o 21 de maio de 2007 (ficheiro .mp3 927.45 KB)

>> Escoita ao autor recitando fragmentos desta obra
Gravado en Vigo o 9 de novembro de 2005(ficheiro .wma 1,4 MB)